En brasso desteso

En brasso desteso, en fil longo e rosso….

En boto violento dopo ‘na brusca frenada,
en corpo desteso en meso ala strada;
bisogna far presto, no serve parole e discorsi,
ma sangue ghe vol, dopo i primi socorsi.

Du oci vispi e tanta oia de sugar,
ma fermo sul letin ancò ghe toca star;
el so sangue birichin caprici el fa
par questo, spesso, con altro el va cambià.

El cor malà l’è straco, el ralenta la so corsa,
la vita scapa ja, streta en de ‘na morsa;
cambiar quel cor se pol, col trapianto
ma serve tanto sangue, tanto!!!!!

Par omeni, done e par tante creature
medisine, flebo, chemio: pesanti jè le cure!!!!
E parché el guarir nol resta solo en sogno,
anca de sangue noo lori i gà tanto bisogno.

Quel brasso desteso, quel fil longo e rosso
l’è en dono speciale dal solo amor mosso;
l’è ‘n ato gratuito e continuo de ci
con slancio sa dir sempre “SI”.

“Son pronto”; el sangue lu ‘l dona
saendo che ghe pi’ de ‘na persona
che speta, con ansia e trepidasion,
la linfa vitale de ‘na trasfusion.

Sia de omo o de dona, de sior o poareto,
de bupà de fameia opura d’en soeneto,
quel brasso desteso nol fa graduatoria
nol speta compensi, nol serca la gloria.

A lu e a tanti altri, come lu, donatori,
che i crede nel’omo e nei so valori,
basta che qualcheduno el torna a sperar
o che ‘na vita umana se possa cossì giutar.

‘Sti volontari je parte del’A.V.I.S., asociasion
che, en de ‘na grande cità o en de ‘na frasion,
l’è segno concreto de solidarietà,
testimoniansa vera de gran umanità!

Sercando A.V.I.S. sul vocabolario,
o donatore de sangue volontario,
se cata ‘na definision profonda e vera
scrita da ‘n malà, quasi ‘na preghiera.

“En libro entiero no l’è bastansa
par descrivar come ualtri, con costansa,
la vita, la speransa en tanti fè tornar
con quel brasso desteso, con l’ato del donar.

Tante, tante bele parole dirve mi voria
ma, par l’emosion, la voce la me tradiria,
una sola, impetuosa e direta la ven dal cor:
“Grazie” par el vostro stupendo gesto d’amor!”

Maria Fiorella Azzali


Lazise, maggio 2000

In occasione del 35° anno di fondazione dell’ AVIS comunale di Lazise.